Հարգելի հայրենակիցներ,
Սևան համայնքի բնակիչներ
Շնորհավորում եմ բոլորիս մեր պետության մայր օրենքի՝ Սահմանադրության օրվա առթիվ, որով ամրագրվեց մեր պետականության ինքնիշխանությունը:
Հավատարիմ մնալով ժողովրդավարական սկզբունքներին, հաշվի առնելով ազգային առանձնահատկությունները, աչքի առաջ ունենալով աշխարհի փորձը` 1995թ․-ի հուլիսի 5-ին, համաժողովրդական հանրաքվեի արդյունքներով հայ ժողովուրդը «Այո» ասաց մեր երկրի գլխավոր օրենքին:
Ընդունելով Սահմանադրությունը՝ 31 տարի առաջ ստանձնեցինք մեծագույն պատասխանատվություն պետություն ունենալու և այն կայացնելու համար:
Անցած տասնամյակները լի էին փորձություններով, ինչպես նաև փորձառությամբ, իրավական պետության ճանապարհին առկա խնդիրների ու մարտահրավերների լուծմամբ:
Մայր օրենքն ամենից առաջ յուրաքանչյուր քաղաքացու հիմնարար իրավունքներն ու ազատություններն ամրագրող փաստաթուղթ է, մարդակենտրոն հռչակագիր, որի կենսունակության համար պատասխանատու ենք բոլորս:
Այսօր էլ մեզ համար գերակա են սահմանադրական շատ ուղենիշների բարեփոխման գործընթացի կյանքի կոչելը, որոնց ներդրմամբ կարող ենք գրանցել կայուն առաջընթաց իրավական պետության զարգացման ճանապարհին:
Սահմանադրությամբ ամրագրված արժեքները կարող են դառնալ իրողություն, եթե յուրաքանչյուրս մեր տեղում, մեր աշխատանքով և լիազորությունների շրջանակներում նպաստենք դրանց կյանքի կոչմանը և միաժամանակ կրենք այդ արժեքները: Ավելի ուժեղ երկիր ու կայացած համայնք ունենալու համար պետք է առավել պատասխանատու և նախաձեռնող լինենք` հարգելով այն օրենքը, որը նաև ներդաշնակ հասարակություն ունենալու երաշխավորն է:
Կայացած ու ինքնիշխան պետության վավերագրերն են նաև ՀՀ պետական դրոշը, զինանշանը և օրհներգը, որոնք ամբողջացնում են մեր երկրի դիմագիծը, որոնցով ներկայանում ենք նաև աշխարհին:
Սիրելի հայրենակիցներ, Սևան համայնքի բնակիչներ
Իմ, համայնքի ղեկավարի աշխատակազմի, վարչական ղեկավարների և համայնքի ավագանու անունից շնորհավորում եմ բոլորիս պետական այս կարևորագույն տոնի առթիվ:
Մենք միասին, համատեղ ջանքերով պետք է կառուցենք իրավական երկիր` քաղաքացու և իշխանության փոխադարձ վստահության, հարգանքի, ներքին համերաշխության և կայունության պայմաններում` համատեղելով մեր ջանքերն ու ուժը, միավորելով հզոր ու կայացած պետություն ունենալու մեր ձգտումներն ու նպատակները:
Մաղթում եմ խաղաղություն մեր երկրին, բարեկեցություն՝ մեր ժողովրդին, ամուր կամք և նպատակասլացություն՝ մեր հավաքական երազանքների և նպատակների իրականացման ճանապարհին: