Տեղի ունեցավ նորաստեղծ Սևանի «Առաքս» ֆուտբոլային ակումբի առաջնախաղը։
Հունիսի 22–ին «Առաքս» ֆուտբոլային ակումբի հիմնադրման առթիվ Լճաշենի ֆուտբոլի մարզադաշտում ընկերական հանդիպումներ անցկացվեցին Սևանի նորաստեղծ «Առաքս», Սևանի մանկապատանեկան մարզադպրոցի «Սևան», Հրազդանի «Աղբյուրակ» և «Ախթալա» ֆուտբոլային ակումբների միջև։
«Առաքս» ֆուտբոլային ակումբը նոր է հիմնադրվել։ Թիմը նպատակ ունի հանդես գալ Հայաստանի առաջնություններում, Սևանի տարածաշրջանի բոլոր բնակավայրերում զարգացնել մանկապատանեկան ֆուտբոլը, խրախուսել առողջ ապրելակերպը և պատանիների շրջանում բացահայտել լավ ֆուտբոլիստների՝ հետագայում նրանց ուղղորդելով ավելի մեծ բարձունքների։
Բացի ակումբի հիմնադիր Արթուր Կարապետյանից, «Առաքս» ֆուտբոլային ակումբի ստեղծման ակունքներում է կանգնած նաև Մարտիկ Կարապետյանը, ով ապրում է ՌԴ–ում։ Նորաստեղծ թիմին աջակցում են նաև բազմաթիվ անհատներ և կազմակերպություններ։ «Առաքս» ֆուտբոլային ակումբի ավագ մարզիչն է Միքաել Բաբաջանյանը, մարզիչն է Կարեն Կարապետյանը, դարպասապահների մարզիչն է Արտյոմ Կարապետյան։
Նորաստեղծ «Առաքս» ֆուտբոլային ակումբի փոխնախագահ Աղաբեկ Դավթյանի խոսքով՝ անելու են ամենը, որպեսզի գյուղական բնակավայրերի պատանիների շրջանում հետաքրքրություն առաջացնեն ֆուտբոլ մարզաձևի նկատմամբ։
Վերջին օրերին ակումբը որոշ բարեկարգումներ է իրականացրել Լճաշենի մարզադաշտում։
«Առաքս»–ը սկզմնական շրջանում մարզումները կանցկացնի Լճաշենի մարզադաշտում, որտեղ էլ կայացան առաջին ընկերական հանդիպումները։ Մինչև խաղերի մեկնարկը հնչեց ՀՀ հիմնը և բարձրացվեց ՀՀ պետական դրոշն ու «Առաքս» ֆուտբոլային ակումբի դրոշը՝ ազդարարելով խաղերի մեկնարկը։
Չորս թիմերի ընկերական հանդիպումներից հետո թիմերը, լավագույն խաղացողներն ու մարզիչները պարգևատրվեցին պատվոգրերով, մեդալներով, գավաթներով և հուշանվերներով։
